ادفع فواتير النعم لحسن تتسحب منك .
كتبت : شيرين رأفت
(ولا تَجِدُ أَكْثَرَهُمْ شَاكِرِينَ ....آية ١٧ الأعراف )
ترررن ترررن ترررن
دق تليفون عم حسين
عم حسين: ألو ايوه مين معايا ؟
عم إبراهيم: ايوه يا حسين انا ابراهيم
عم حسين: اهلا يا ابراهيم خير
عم إبراهيم: ابدا قلت اسأل واسلم عليك، عامل ايه ؟
عم حسين: أهوه عايش
عم إبراهيم: امورك بخير ؟
عم حسين: اهي ماشيه .
عم إبراهيم: العيال كويسين ؟
عم حسين: مطلعين عيني .
عم إبراهيم: والشغل عامل معاك ايه ؟
عم حسين: تعبت واتهديت ربنا يخدني ويريحني .
عم إبراهيم: ليه بس
عم حسين: اهوه ، ربنا يمشينا منها على خير، سلام بقى دلوقتي .
عم إبراهيم: ماشي يا حسين مع السلامة .
قفل ابراهيم المكالمة مع حسين وهو مستغرب جدا ردوده اللي بتتكرر في كل مكالمة ، وبيسأل نفسه هو ليه دايما كده مش راضي رغم انه حاله أحسن من ناس كتير ؟!
عم حسين شغال نجار عنده ورشه بتاعته ( رزق حلال -صحة)
عم حسين متجوز ست محترمة ومتدينة ( الزوجة الصالحة )
عم حسين عنده ٣ أولاد وبنت ( درية )
عم حسين عايش في بيت إيجار قديم ( سكن مأوى)
عم حسين ده مثال لناس كتير قوي ، تكلمهم وتندم إنك سألتهم عاملين إيه، وتبقى كأنك فتحت حنفية من الشكاوي مبتتقفلش، وتبقى عايز تقولهم طيب مفيش حاجة حلوة خالص !
من الأخر كده يجبولك إحباط،وتقفل معاهم المكالمة وإنت عندك حالة من الحزن .
عم حسين عامل زي مدام سعاد ، اللي ليل ونهار تشتكي لأخواتها وأصحابها من ولادها وجريها وراهم والتنظيف اللي مبيخلصش واللعب اللي مرمية في كل مكان والمواعين الكثيرة،
وبعد سيل الشكاوي نامت بالليل مهدودة من كتر الشكوى ، وحلمت حلم إنها هي والعيال تعبوا تعب جامد ومبيتحركوش من السرير، وفجأة البيت مبقاش ليه حس العيال تعبانين مش قادرين يلعبوا ونايمين في السرير وهي مش قادرة حتى تقوم تعمل لقمة ياكلوها ،
وصحيت من النوم فجأة مش مصدقة نفسها وبتقول الحمد لله إنه كان حلم جريت فتحت الشباك وبتبص للسما وتقول الحمد لله على نعمة الصحة الحمد لله اني هاقدر انظف واطبخ وأغسل، الحمد لله ان عيالي بصحة وعافية وبيجروا ويطنططوا، الحمد لله إن المواعين كتير معناها اننا قادرين نطبخ وناكل الحمد لله دِمها علينا نعمة يارب.
الناس دي كتير في حياتنا معندهمش الكونسبت بتاع الحمد لله،
حتى لو عندك مشاكل، فأكيد عندك نعم كتير، الصحة أولها وأهمها،
ولو مش حاسس بالنعم دي، وبتسدد فواتيرها، وبتشكر ربنا عليها، بلسانك وعملك هتتسحب منك، وقتها بس هتعرف قيمتها، وتندم على إنك مشكرتش ربنا عليها عشان يديمهالك ،
فعن عائشة رضي الله عنها قالت :
( كان رسول الله صلى الله عليه وسلم إذا رأى ما يحب قال الحمد لله الذي بنعمته تتم الصالحات وإذا رأى ما يكره قال الحمد لله على كل حال ) .
الحمد لله لأن كل أمر ربنا خير، وبتشكي ربنا لمين ؟!
عندك مشاكل، نقص ، فقر ،ضيق أي حاجة ادعي وقول يارب كلامك للناس والشكوى المستمرة بتزيد الكرب مش بتقلله.
