مابقتش فارقة
بقلم - محمد عبدالعظيم
مابقتش أخاف مابقتش أحس
مابقتش فارقة
مليان مشاعر وقت الألم والكلمة تايهة
ويوم فراقنا كسرتى قلبى بكلمة بايخة
مستغربك من يوم ما قولتى مابقتش قادرة
تكملى مشوار حياتنا وذكرياتنا
أنا كنت فعلاً محتاج لوقفة بدون مبالغة
مابقتش فارقه تحسي بيا واحس بيكى
أصبحت ماضى
وكنت راضى عشان عنيكى
أيامى كانت كلها عايشها ليكى
وماتقلقيش
ماتقلقيش إنك فى يوم غدرتى بيا
وطفيتى قلب كان فى يوم ملهوف عليكى
كنت فاكر من البداية هاتكونى ليا
كنتى بالنسبالى عالم
كنتى الهدية
ياما قولت عليكى جنة
وياما قولت انتى الحورية
ومع الأسف
طلعت أنا فاصل فى تمثيلية
قلبى اللى كان يتمنى ترضى عنه فاق
فاق من حقيقة مجسده فى هيئة وفاء
فضّلت أخرج من حياة نهايتها إنتى
رغم إن كنتى كل حاجة
وكنتى بنتى
وبالمناسبه
أنا بُعدى عنك كبريـــــــــــاء