باب رزق
بقلم
محمد عبدالعظيم حماد
مفاتيح الرزق كثيرة
وأبواب الرزق مع ربنا أكثر
الصلاة ،، والصوم ،، وجبر الخواطر ،، والصدقة
وكثير من أبواب الرزق قدامك حبل نجاة للغرقانين
علشان كده لازم تسيب باب مفتوح دايماً بينك وبين ربنا
حافظ على الصدقات المخفية
حافظ على صلاتك
حافظ على كلمة وضحكة من القلب تجبر بيها المحتاج
وربنا يكفينا شر المعافرة في السكة الغلط
يمكن من زمان والحاجة اللي معظم الناس مشغولة بيها هي الفلوس
كل الناس بتفكر إزاي يحسّنوا من دخلهم
وإزاي يحسّنوا من مستوى معيشتهم
وطبعاً أكيد كلنا بنتمنى زيادة في الرزق
لكن مش كل الرزق فلوس
الصحة رزق ،، والأولاد رزق ،، والستر رزق
والأرزاق متقسمة بأمر ربنا بالتساوي وكل واحد واخد رزقه وزيادة
أبواب الرزق مع ربنا أسلوب حياة
كل ما هاتعمل خير حتى ولو كان بسيط بالنسبالك بيتردلك خير بزيادة
ومش هاتبقى ملاحق على الخير اللي هايجيلك
وده لأن ربنا أكرم منك
وتأكد إن المكان اللي إنت فيه دلوقتي والحالة اللي إنت وصلتلها هيَّ أنسب حاجة ليك في الوقت الحالي
فيه رزق بيجيلك على هيئة أذى أو تعب بيتشال عنك
فده في حد ذاته رزق
ومش لازم المقابل يبقى في لحظتها
كله متسجل وثوابك عمره ما هايضيع حتى لو اتأخر شوية فتأكد إن ده لمصلحتك
ورزقك هايجيلك في أنسب وقت ليك
تاجر مع ربنا وانت هاتبقى أسعد الناس.