بالمظبوط
بقلم : مايسة إمام
باسم الحب قالوا تموت
واهي حكاية يوم وتفوت
قالوا شوفوا اللبس وحالها
مكشوفة شكلها كدا مغلوط
كل لسان بيبخ في سمه
في الأعراض بيخوض مبسوط
ويبرر يعمل أسباب
ثوب دايب كله منقوط
بكره الرد يجيله في وقته
يوم الرد معاده مظبوط
هي نتيجة ولا حقيقة
إن عقولنا بقت نبوت
وإن نفوسنا بقت سكينة
دابحة الكل ولو كتكوت
سهل يحني الدم إيدينا
صعب الأرض عليها يفوت
أصل قلبها قلب الأم
حضنها يستر رغم الدود
لكن عمرها تقبل تروي
منه ترابها يبقى حنوط
قالوا باسم الحب تموت
كله هوس وبس سكوت
زينة الدنيا هانت مااتصانت
رغم كنا عليها هنموت
والنعمة فيها فرطنا
اتلقاها العنكبوت
أصل مفيش ولا دين
علمنا ولا قرآن قرأناه مظبوط
ولا أخلاق يوم جينا زرعنا
لجل يملى حصادنا بيوت
قبل مانيجي نربي ولادنا
نتربى احنا بالمظبوط .