البيت الكبير بيت العز والجود والكرم بيت امي البيت الطيب
كتب -احمد فتحى حامد عطوه
البيت الكبير بيت العز والكرم والجود البيت اللي مليان محبة وحنان هو بيت امى من فينا ينسى هذا البيت البسيط اللي يحمل كل دفا وحنان ومحبة .
لما تبقى راجع من مشوارك كده فى يوم و تعدى كده على أمك الحاجة أو تروح تاخد ولادك من عندها
او حتى تعدى تسلم على امك بعد الشغل تقول لك أقعد الطعام جاهز يا واد اقعد كل معايا وانت تقولها كتر خيرك يا مى .
وانت مهما قلت يدوم خيرك
والا سبقتك والكلام ده كلو .
الرد لازم ييجي من امك هتاكل يعني هتاكل والغريب بقى في الموضوع إنك فى كل مره هتروح تلاقي منابك من الطعام موجود وجاهز وسخن ولسة فيه ريحة طبيخ زمان ريحة طبخ امى .
طب إزاي بتبقى عارفه إنك جاى ليه كل مره ومش بس كده كمان وانت نازل من عندها اكيد طبعا شايل أي حاجه من عندها من خيرات البيت الطيب الكبير وده كلو مينفعش برضه تقول لأ لامك واحتمال تديك كده مبلغ من المال فى ايدك تقول ليك اديهم للعيال ولادك مع جملة المليان يكب على الفاضى.
البيت الطيب البيت الكبير
بيت العز والجود والكرم
اللي مهما عشت فى بيوت أحلى وأفخم يظل هذا البيت اللي فيه أمك هو الفردوس الأعلى حتى لو بيت بالطوب الني والطين.
بيت البراءة والدفا و الونس وريحة اخواتك بيت أبوك وامك
بيت الكرم محترم ولو بدور واحد
وبيت البخيل لو فدان مايشيل ولا واحد