شباب مصريين من داخل صمام القلب
تحية واجبة وعرفان بالجميل
كتبت الإعلامية / وسام خاطر
أوقات بنمر بظروف صعبة وبنكون مشتتين ومش لاقين حل أول مش عارفين نختار والمناخ العام حاليا من توقيت أمتحان الثانوية وحتي ظهور النتيجة وكمان التنسيق وكل الأهالي متلخبطة وفي حالة عدم أتزان من خوف وقلق وتحديد مصير وإذ فجأة تلاقي شباب زي الورد ضحكتهم جنان وذكاءهم خارق وكلماتهم دواء وطوق نجاه لكل طالب .
هما مين دوول وفين دوول طلبة كلية أداب جامعة الأسكندرية عملو جروب وبدأو يعرفوا كل الطلبة المستجدين علي كل الأقسام وعندهم أجابة علي كل أستفسار لا بيكلو ولا بيملو .
صدورهم رحبة لكل سؤال بيوجهوا الطلبة التوجيه الرشيد بيردو علي الاسئلة بكل أمانة مش كده وبس تخيل أنهم يجمعو كل الطلبة المستجدة ويجهزو قاعة بأحد مسارح الأسكندرية العريقة لشرح كل تخصصات الكلية لايف شرح حي للطلبة بدون مقابل وتيجي تقول شباب الأيام دي طايشة وغير مسؤولين طب أزاي والحلوين دوول موجودين وأكيد زيهم كتير شباب وبنات هما مش محتاجين أي حاجة غير الدعم النفسي والمعنوي.
تحية من داخل صمام القلب لكل من قدم نصيحة أو أستشارة تعتبر طوق نجاه لطالب ممكن تكون سبب في تغيير مسار حياته وتفكيره .
طاقة حب غير طبيعية عطاء بدون حساب لمجرد أنهم حابين يساعدوا غيرهم ويظهروا كليتهم بأفضل صورة هذا معني من معاني الوفاء للجزء الخالص فيهم للحرم الجامعي.
أتمني نسلط الضوء علي كل شخص إيجابي في حياتنا حتي لا يشعر بضيق الصدر.خالص التحية والتقدير والشكر والأمتنان .