الكذب عند الأطفال
بقلم : د .فتحيه جابر
استشاري نفسي وتربوي
كثير منا يعاني من مشكله الكذب عند اولاده
وعلشان تعرف تعالج مشكله الكذب عند ابنك
او بنتك لازم اول حاجة نعرف ابني بيكدب ليه؟
ابنك ممكن يكدب علشان خايف منك ومن العقاب.
ابنك ممكن يكدب علشان بيقلدك اه لو انت بتكدب في مواقف قدامه حتي لو بسيطه ابنك كمان هيكدب.
ابنك ممكن يكدب علشان يحصل علي اعجاب واهتمام اصحابه.
ابنك ممكن يكدب علشان مفيش حد فهمه وعرفه الفرق بين الصدق والكذب والامانه ومحدش فهمه القيم واهميتها.
ابنك ممكن يكدب علشان خياله واسع ومش قادر يفرق بين الحقيقه والخيال.
ابنك ممكن يكذب علشان علطول تقوله انت كداب.
في اسباب كثير للكدب لازم تعرفها كويس علشان تقدر تساعد ابنك او بنتك لكي يتخلص من مشكله الكذب وخد بالك كذب الطفل قبل اربع سنوات ميعتبرش كذب لان الطفل مبيقدرش يفرق بين الحقيقه والخيال.
ولان الوقايه خير من العلاج لازم تخلوا بالكوا من اللي هقوله علشان تتجنبوا وتعالجوا مشكلة الكدب عند اولادكم
اولا : لازم تكونوا قدوه حسنه لاولادكم
يعني متحولوش تكدبوا قدامهم.
ثانيا: متطلبوش من ولادكم يشهدوا قدام بعض لان كل واحد مش هيطلع نفسه غلطان و ممكن يلجأ للكدب.
ثالثا : كافئي ابنك علي قول الصدق ولو عايز تفهمه متتكلمش معاه عن الكذب بل اتكلم معاه عن الصدق ومزاياه.
رابعا : بلاش عقاب بالضرب الضرب بيخلي ابنك خايف والخوف بيخليه يكدب.
خامسا : ازرعوا الثقه في نفوس اولادكم، اتكلموا عنهم كويس قدام الناس حسسوهم انكم فخورين بيهم علشان تزيد ثقتهم في نفسهم وخاصه بين زملائهم وميضطروش يكدبوا علشان يحسوا بذاتهم وسط أصحابهم.
سادسا : مش كل حاجه تقولوا عليها لا خير الامور الوسط لو حاجات بسيطة وافقوا عليها ولو في حاجه مرفوضه اتناقشوا معاهم.
سابعا : لازم تعملوا علي تنميه الوازع الديني
لهم من خلال الذهاب للمساجد والكنائس .