المضمون مستباح
بقلم : شيرين كمال
قاعدة غريبة فكرت فيها كتير أوي بس مش قادره أوجد لها عذر ولا تفسير ولا تبرير ، بل بالعكس بوصف القاعدة ومؤيديها بالغباء الاجتماعي، لانك بتتعامل غلط مع الشخص الصح .
وانت مش عايز توسع مخك وتفهم إن ده أكثر إنسان لازم تعامله بتقدير وإحترام
الشخص اللي وصلك إحساس أنه مضمون يبقى وصلك إحساس أنه اد إيه بيحبك واد إيه بيحترم وجودك في حياته واد إيه حاسس بنعمة ربنا بأرتباطه بك .
مش علشان أنت محصلتش ولا علشان ربنا مخلقش زيك .
كل الحكاية أن ربنا حط حبك في قلبه يعني لا هي شطاره منك ولا فهلوه ، مجرد كرم من ربنا ورزق ليك .
بس احنا كالعادة كتير مننا مش بندوس غير علي اللي بيرضالنا الرضى نرضى اعتقاداً مننا أننا ملكناه بقوتنا وسيطرتنا واحتياجه لينا أي ما كان نوع الاحتياج مش مهم خالص ، المهم أنه كده بقي زبون ولازم نستغله ونسيطر عليه ونقرفه علشان نطلع تراكيب النقص اللي اتربينا عليها
ويا سلام بقي كمان لو في ام أو أب واخوات بيطبلوا ودايما معجبين بحاله الافترى اللي انت فيها وسيطرتك وقوتك
وركوبك العلاقه، ونظرا لتربيته الغلط هو بيسخن زيادة ويزيد من أفعاله أكتر .
طيب نحافظ عليه ونحس أنه رزق وكرم من ربنا ونحافظ على حياتنا ، لا خالص احنا نتعمد نأذيه وبشكل متعمد ، اكننا بنمتحن صبره في تحملنا ومش مرة ولا مرتين لا ٥٠٠٠ مرة ونبيع وتشتري ، لحد ما نزهقه من العيشه واللي عيشنها.
وساعتها بيأخد قرار أنه يمشي ويسيب كل حاجه حلوه عملها وبناها ويخسر حياته وسنين عمره اللي ضيعها مع الشخص الغلط لانه ببساطه جاب آخره وحس أنه مش قادر يكمل في العيشه الموبوئه دي مع حد مش عايش معه ده عايش عليه.
هنا بقي نسيبه لا... خالص
احنا نبدا نرمي اللوم عليه أنه خرب البيت وهده وأنه كان لازم يتحمل ، علشان خراب البيت مش بالساهل وننسي خالص كم الخراب اللي احنا كنا سبب فيه و أنه بني ادم وليه قوة تحمل ، وقدره علي الاستمرار في وسط الضغوط.
لازم نراجع روحنا ونتعلم نحافظ على نعمة ربنا خصوصا لما ربنا يحطهلنا في شخص مش عايز حاجة من الدنيا غير رضانا، والاستمرار في العيشه معانا .
كفاية بقى معظم البيوت اتخربت بسبب أننا بنطلع عقدنا علي بعض والأنانية اللي بتعمي عنينا حتى عن اولادنا .