الكتمان هو الراحة الأبدية
كتبت - شيرين كمال
لو عاوز تعيش مرتاح إعمل بنصيحة الإمام بن الجوزي حين قال :
" إكتم عن الناس ذهبك وذهابك ومذهبك "
أما ذهبك :
فحالتك المادية ودخلك متحكيش عنهم علشان لو معاك متتحسدش ويتطمع فيك ولو مش معاك محدش يعاملك بشفقه ويستقل بيك ومش شرط ذهبك يكون فلوس ممكن يكون صديق جدع بيفهمك وكل صاحب نعمة محسود فداري على نعم ربنا عليك بحيث يدوم وجودها وتفضل تحس بقيمتها وفرحتك بيها.
أما ذهابك :
بمعنى إن لو مقدم لوظيفة جديدة ماتقولش الا لما تتم ، لو جايلكِ عريس ماتقوليش .
ماتحكيش وربنا يسهلك في أي خطوة ماتفضحش الدنيا وإسكت ، إمسك لسانك وهتلاقي خططك بتتحقق كأنها بتجري.
سيدنا يعقوب أبو سيدنا يوسف قال له :
" لا تقصص رؤياك على إخوتك فيكيدوا
لك كيدًا "
تخيل ، خاف انهم يحسدوده رغم إنه كان مجرد حلم وبخصوص
"وأما بنعمة ربنا فحدث"
فمعناها ماتنكرش نعمة ربنا عليك وإحمده على كل حال وإلبس وكل كويس ولكن تستر بنفسك ولا تتفاخر برزقك .
وأما مذهبك :
يعني ميولك وأفكارك بتحب إيه وبتكره إيه ، عشان ماتدخلش في جدالات فارغة وتوجع قلبك بحوارات ملهاش أي لزوم
ولو عاوز ترتاح ماتنصحش اللي مطلبش نصيحتك، إلا لو كان شخص بيكبر بيك ومش هيندمك على كلامك معه .
وبرضه ماتقولش اسرارك لأن بمجرد ماتحكي هتبقى كارت واتحرق ومحدش هايبقي عنده فضول يعرفك عشان الفضفضة ليها شهوة سواء للي بيتكلم
أو للي بيسمع.
بس أول ماتخلص فضفضة بتنتهي شهوة غيرك منك ويميل ، خليك باب مقفول وساعتها هتفضل محافظ على زهوتك ولمعانك في نظر اللي حواليك.
يقول سيدنا عمر بن الخطاب :
ندمت على الكلام مرات وما ندمت على الصمت مرة .