في ضيافة عالم الفن
حوار مع الفنان يوسف حماد
كتبت - شيماء محمود
فنان موهوب شارك في عدة اعمال تلفزيونية منها اللي اتعرض في الموسم الرمضاني لهذا العام يعشق الفن منذ الطفولة كان حلما له
فأصبح حقيقة.
في البداية نحب نتعرف عليك ؟
أسمى يوسف حماد أنا مش خريج معهد فنون مسرحية أنا بكالوريوس سياحة وفنادق لكن بدأت من مسرح المدرسة ومسرح الجامعة
كلمنا عن البداية كانت في اي مسلسل ؟
اشتغلت ميديا وبدايتى في مشهد من مسلسل الزوجة ١٨ وبعدين مسلسل قيد عائلي ومسلسل فلانتينو مع النجم الأستاذ عادل امام وضربة معلم ومسلسل كل ما نفترق ومسلسل الفنان أحمد العوضى وياسمين عبد العزيز
اللي مالوش كبير ومسلسل حكايات بنات الجزء الرابع وبعدين جت النقلة الأحلى في حياتي وكلمنؤ أستاذ محمد حجاج الكاستنج دايركتور فى دور شعبان مسلسل نصيبى وقمستك 4 حكاية( حلوه اللقطه )وده كان دور مهم خمس حلقات وعمل ردة فعل مكنتش متوقعها ونجح والحمد لله .
هل كان فى عمل فى الموسم الرمضاني 2023 ؟
رمضان اللي فات كلمتني الأستاذة خلود سرحان وجابتلي دور فى مسلسل الاجهر مع الفنان عمرو سعد وعمل ردة فعل كويسة أوي مع الناس والحمد لله
ومسلسل سره الباتع للفنان أحمد صلاح السعدني
والنجمة حنان مطاوع
كان ايه راي الاسرة عند دخولك مجال التمثيل مع ولا ضد؟
أبويا الله يرحمه مكنش موافق أدخل معهد فنون مسرحية وفعلاً مقدمتش عشانه لكن امى واخواتي مبسوطين ومرحبين جدا
ولما أبويا رحمه الله لقانى عملت مشهد فى مسلسل إسمه يوميات مصرى وأنا فى الجامعة عجبه تمثيلى وبعدها وافق لكن وقتها كنت داخل رابعة جامعة وبعد كده أصبح والدى أكبر داعم ليا بعد ماكان رافض لما شاف تمثيلى ومكنش مصدق أنى موهوب وشاطر كده
ما هو اقرب عمل الى قلبك ؟
كلهم قريبين ليا وبحبهم وبحب كواليسهم وفاكر كل تفاصيلهم
هل يوجد اشخاص وقفوا بجانبك وقدموا دعم ليك في البدايه؟
الأخ والصديق محمد حجاج كاستنج دايركتور أستاذ كبير ووقف جنبى من بدايتى لحد دلوقتي وساعدني لأنه أمن بموهبتي وهو سبب فى حاجات كتير حلوه ليا فى المجال وهو شخصية مهمة جداً بالنسبة لي
و الشاطر جدا ماجد ريچى ووقف جنبى برضوا
هل يوجد هوايات أخرى بجانب التمثيل ؟
تقدري تقولي أن هواياتي كلها بالبلدى كده بتصب للفن
ولأنى مهووس بفن التمثيل يعنى أنا بحب اقرأ فى مجالات كتير زي علم النفس والأدب العربى للعقاد ونجيب محفوظ وبحب شعر المتنبئ وبحب له بيت الشعر اللى بيقول فيه
ولا مجد فى الدنيا لمن قل ماله ولا مال فى الدنيا لمن قل مجده
وكمان بحب اتمرن يعنى زي ماقولت أنا كل هواياتى بتصب لفن التمثيل فى الآخر لأنى مهووووس جدا بالتمثيل والسينما فى مصر وبره مصر والدراما والمسرح
هل ممكن فى يوم من الأيام ترفض عمل فني تحس انه مش شبهك او يضيف ليك في مجال الفن ؟
كلمت مش شبهى دى ملغية من قاموسى لفن التمثيل لأن أنا عندي هدف من الطفولة أنى أمثل كل الأدوار وبشتغل على نفسي عشان لما يجيلى أي دور انفزه صح بكل تفاصيله ومفيش أي دور مبيضفش للفنان إلا لو كان دور خارج عن الهويه المصريه والعربية وضدهم وهوه ده الدور اللى ارفضه وبشده كمان
هل فى أعمال قادمة إن شاء الله ؟
لسه مفيش شغل على أرض الواقع لكن بنسبة كبيره هيكون فيه طبعاً لكن خليها بعدين لما امثله ووقتها طبعاً مش هلاقى جريده أحسن منكم عشان احكيلها عن الدور الجديد وتفاصيله
واخيرا ايه هي امنياتك اللي بتتمناها في حياتك الخاصة وحياتك الفنية ؟
فى حياتى الخاصة بتمنى أمى دايما تكون بخير وجنبي وأقدر أسعدها وافرحها وهي أكبر داعم ليا فى كل الأوقات ومؤمنة بيا جداً وأقابل حب حياتى ويكون عقلى وقلبى متفقين عليها لأنى عندى طموح كبيييير مالوش نهاية
أما حياتى الفنية فا أنا بتمنى وبسعى وبجتهد أنى أكون فنان حقيقي ليا بصمتى سواء سينما دراما
أو مسرح .
بتمنى أكون نجم سينما واعمل نقلة فنية فى صناعة السينما المصرية والعربية وده هدفي من الطفولة
في النهاية تتمني أسرة جريدة دايلي برس مصر
لك كل النجاح والتوفيق الدائم وتحقيق كل ماتتمنا
في عملك إن شاء الله.