الوجع مبيتحكيش!
بقلم : شيرين كمال
مبيتحكيش .. الوجع مبيتحكيش !
الجمله دي قالها صالح سليم بإنفعال في فيلم (الشموع السوداء ) و نجاة بتسأله بإصرار مالك ؟!
حقيقية أوي الجملة دي
كل إللي بتفضفض بيه ده مش الوجع الحقيقي ، ده شوية كلام على الوش مجرد عنوان لإحساسك !
لكن الوجع الحقيقي بيبقى جوه أوي
إنت نفسك مبتعرفش حجمه !
مبيعرفهوش غير ربنا وبس .
ومبيهداش غير بلطف ربنا وبس .
فيبعتلك حد يطبطب عليك
حاجات تنشغل فيها أوي متلحقش تفكر
يديك الهمه تقرب منه اكتر وتلجأله
حتى الصدمة وإنك مش مستوعب إللي حصل، فيها لطف ،متستحملش لو إدراكك كامل !
بيديك مسكنات لحد ما الوجع تاخد
عليه !!
أيوه تاخد عليه .. وهو ده إللي بنسميه
( نسيان ) لكن الوجع مبيتمسحش !
لولا النسيان نبقي منتحركش من كتر الأوجاع والحياة تقف !
كل ده لُطف ربنا .
الشيخ الشعراوي كان بيقول مينفعش تفكر في المصيبو قبل وقوعها لأنك بتفكر فيها من غير ما يكون اللطف نزل ، فصعب أوي نتحمل من غير لطف الله .
الوجع هو علاقه خاصة جداً بينك
وبين ربنا .