اقل خسارة فى العلاقات
نهلة زغلول
أستشاري علاقات وصحة نفسية
أقل خسارة في العلاقات هى الخسارة المادية
واكبر خسارة هى الخسارة المعنوية سهل اوي نعوض الفلوس بس مش سهل نعوض الحسرة والانكسار والخذلان فى علاقة كانت مبينة على الحب والحنان
على سنيين وشهور وساعات ما بين فرح وضحك وانبساط ومواقف بتجمع بينا وزيارات ومحلات وكافيهات ومولات وشوراع مشيت فيها ومابين ساعات طويلة بنتكلم فى الموبيلات لحد ما الشحن يفصل منك وبين شات عل الواتس اب وكلام بيقول اني بحبك وليك قيمة لوجودك فى حياتى
وكمان بين اوقات كتير عادي جدا بنزعل فيها عشان احنا بشر مش حجر لينا مشاعر متقلبة ومود متقلب بين الحين والآخر.
وساعات كتير بنشعر بالعجز وقلة الحيلة بس بيكون عندنا رصيد من العشرة والحب اللي يخلينا نكمل ونسامح ونخفف من اللوم والنقد عشان نعدي ونكبر ونتغافل عشان المركب تمشي
ودا دليل على القوة والمعزة والنضج والوعى بإن مفيش حاجة كاملة الكمال والمثالية لله وحده
بس دا اما نكون فعلا عايزين الدنيا تمشي وندور على الحلول ونبادر بالخير .
بس الف خسارة على الناس اللي دايما منتظرة غيرها يقدم وعايزين حقوقهم بدون ما يسعوا ويساعدوا
ومش فارق معاهم نخسر ونكسر ونخذل قلوب بحجة او بدون.