في مصر أم الدنيا
في مصر أم الدنيا
بقلم : الكاتب والشاعر عماد الدين محمد
في مصر أم الدنيا
الكل عامل مفتح
اللي قاعدين على القهاوي
عاملين مجالس للفتاوي
واللي نايمين على السرير
خبراء في الإقتصاد وسياسيين
والبصمجية والبراوية
طالعين نزلين
منشورات وتغريدات
والبلوجر واليوتيوبر
دا غالي ودا رخيص
ياللي سامع كلامي هاتندم
قوم اتفرج و إشتري تاني
واللي ناسخ كلمتين
وإللي قعده فاتحه كام
نازلة رغي ومش فاهمين
أهو كلام والسلام
لا واللي زاد وغطى
نازلين فتاوي في الدين
دا حلال ودا حرام
وما حد شايف
ما الملاية مغطية
واللي يزيد المبلاه
ناس كتير مصدقاهم
وادي الف لايق وتعليق
هى مش زفه ولا هيصة
دا جهل وخيبة مدرية
كل واحد ولا وحدة
محتاجين لعقولهم عملية
نصيحتي ليكم
ولأصحاب العقول الواعية
عوزين نفوق من الخيبة دي
كفاية نفاق ووصولية
ونشر إشاعات وهمية
وفتاوي وتمثيلية
عارفين
الكذابين إتمادو في كذبهم
لما لقوا الجهلة مصدقينهم
يبقى العيب على مين
ولا أنتم فاكرنه تمثيلية
ده مصر أم الدنيا
وطن وجدار يحمينى
وزي ما راح مليون شهيد
أرضها بتنبت ملايين
يحموها
من اللي بينهشوا فيها
فيها ألف جيش
وجنودها خير الجنود
وشعبها في رباط
ليوم القيامة
محمية بالأذان
محروسة بالقرآن
وبحضن الصليب للهلال
وعزف السلام الوطني
على أوتار النيل
وحدودها اللي سهرانه
تغني لعبد الحليم
خالي السلاح صاحي
دا حرب إعلامية
من الداخل والخارج
على مصر الأبيه
مأجورين مخربين
أبطال في تمثيلية
والمخرج والمنتج
أعداء للأمة والحرية
دي مصر أم الدنيا
مش عزبة ولا تكية
دي مصر ياسادة
يعني الحصن المنيع
اللي وقت الشدة
خرج منها صلاح الدين
وسيف الدين
واللي عبر القناة
واللي مات ماسك العلم
واللي بيبني ويزرع
وشق الترع
دي مصر أم الدنيا.