حقيقة ال 24 قيراط
كتبت - شيرين كمال
من الأفكار اللي عمري ما إقتنعت بيها هي فكرة إن كل واحد فينا ليه في الدنيا 24 قيراط وكلنا زي بعض بس مختلفين في التقسيمة يعني ناس وخداهم شوية صحة وشوية فلوس وشوية راحة بال وناس تانية وخداهم شوية أطفال و شوية نجاح و شوية جمال..كده يعني.
المهم الفكرة دي عمرها ما دخلت عقلي لأن الواقع مبيقولش كده لأن بالفعل لو بصينا حوالينا هنلاقي تقسيم الأرزاق مش كده يعني فيه ناس معاها فلوس وعندها أطفال و محترمين وصحتهم كويسة ومشاكلهم عادية زى باقى الناس و فى المقابل تلاقى ناس مش لاقية تاكل و لا تأكل عيالها
و ميملكوش حتى الصحة ومتقوليش يملكوا راحة البال والسعادة لأن اولا مفيش راحة بال أبدا وانت مفيش معاك حق علاج إبنك ونايم ومش عارف هتجيب بكرة أكل لعيالك منين ..ثانيا مين اللى قالك ان الغنى ميملكش راحة البال والسعادة.
لو فكرنا هنلاقى عادى فيه فقير محروم من الاطفال وغنى محروم من الصحة وفقير محروم من راحة البال وغنى محروم من السعادة وفقير يملك الستر وغنى يملك حب الناس..فنلاقى ناس تملك 18 قيراط وناس 5 وناس 14 وناس 12
جبنا منين بقى فكرة ال24 قيراط دى أعتقد الفكرة دى إخترعها أغنياء المجتمع لتهدئة الفقراء أو إخترعها الشيوخ لتحقيق توازن نفسى عند الناس.
طيب يبقى هنا فيه سؤال يطرح نفسه أين العدل؟
بما لا شك فيه أن الله عدل بل هو العدل المطلق يعنى مستحيل يظلم عبد من عباده لكن مين أصلا قال إن الدنيا دار العدل مين قال إن الفرص متكافئة والأرزاق متكافئة
و النعم متكافئة والإبتلاءات متكافئة
مين اللى قال؟
أعتقد إن العدل يتحقق لو إتكلمنا على حياة الإنسان عمتا يعنى دنيا و أخرة يعنى ال24 قيراط لو هنتجاوز ونستخدم التعبير ده هيكونوا دنيا و أخرة وبرده ده مقدار ربنا وحده اللى يعلمه يدى اللى عاوزه ويحرم اللى عاوزه سواء دنيا أو أخرة.
فكرة ال24 قيراط دى لو صح يبقى الغنى ميساعدش الفقير لأن الفقير كمان يملك ال 24 قيراط فالغنى لو إدى فلوس للفقير كأنه بيعترض على تقسيمة الأرزاق والعدل وخصوصا انه مش هياخد فى المقابل مثلا قيراط صحة من الفقير ولا هو ال24 في الوقت ده بتتحسب فلوس بس .
اللى أقصده إن بدل ما نقعد نحط أيدنا على خدنا ونقول كله واخد 24 قيراط لأ المفروض يكون فيه تكافل من اللى معاه على قد ما يقدر وسعى حقيقى من اللى مش معاه على قد ما يقدر ومنعلقش خيبتنا على شماعة الرضا لأن الرضا الحقيقى مش إنك تخلف 5 عيال وتعيش مش عارف تأكلهم وتقول ده رضا وكله برزقه ولما ابنك بيجى برزقه بتشغله علشان يساعدك ليه؟
مفيش حاجة إسمها 24 قيراط الناس في المجاعات واخدين ايه من ال24 قيراط وتساويهم إزاى بساكنى القصور و أصحاب الملايين.
أكيد كل شخص إتحرم من نعمة ليه قدر عند ربنا و.هو وحده اللى عارف إزاى هيعوضه سواء كان غنى أو فقير لأنه هو وحده اللى يملك كل قيراط عدل وهو وحده صاحب المن والمنع ولا نملك إلا المحبة والتكافل والسعى والرضا.